என்னைப் பற்றி

கணந்தோறும் பிறக்கிறேன்
கணந்தோறும் மரிக்கிறேன்
காற்றுக்க்குள் வடிவாகிறேன்

மணம் தோறும் மணக்கிறேன்
மலர் தோறும் சிரிக்கிறேன்
மாற்றின்றி நிகராகிறேன்

குணம் தேடிச் சிணுங்காமல்
கூப்பிக் கை வணங்காமல்
கூட்டத்தில் தனியாகிறேன்

தினம் தோறும் மனம் தேற
தொடுவானுக்கு அருகாகத்
தொலைதூரம் நான் போகிறேன்

படித்தது ஆங்கிலம்; பிடித்தது தமிழ். எழுதியது சிறுகதைகள் நாவல்கள். எழுதப்படாத கவிதைகள் ஏராளம் இன்னும் உள்ளே இருக்கின்றன. என் எழுத்துக்கள் யாரையும் காயப்படுத்தியதில்லை என்னைத் தவிர.

படிக்கும் போது வாங்கிய தங்க மெடல்களைவிட எழுதும் போது கிடைத்த வசவுகள் என்னைப் பெருமிதப்பட வைத்திருக்கின்றன. எந்தப் பயனும் இல்லாத தபால் தலை சேகரிப்பது சிலருக்குப் பொழுது போக்கு; எந்தப் பயனும் எதிர்பாராமல் அன்பைச் சேகரிப்பது என் போக்கு. இங்கே எழுதுவதும் அதற்காகத்தான். என்றாலும் ஓர் எச்சரிக்கை: என் எழுத்தோ,மெளனமோ என்றேனும் ஓர் நாள் உங்களைக் கிழித்து விடவும் கூடும்.

என் சொற்களை நீங்கள் வாசித்திருக்கக் கூடும். என் குரலை நீங்கள் கேட்டிருக்கக் கூடும். என்றாலும் என் மனதின் ராகங்களும் ஆத்மாவின் பாடலும் இன்னும் அறியப்படாதவை

- அன்புடன், 

மாலன்